Зураб Константин-иԥа Ачба дҭахеит 59 шықәса анихыҵуаз Аҟәа ақалақь аҿы, нанҳәа 15 рзы, 2000 ш. Иԥсҭазаара далҵаанӡа, аҵыхәтәантәи амш аҟынӡа активтә зинхьчаҩыс дыҟан – Аԥсны Жәлар Рфорум ахантәаҩы ихаҭыԥуаҩыс, актәи ааԥхьара Апарламент адепутатс, иналукааша ауаажәларратә-политикатә усзуҩын.
Зураб Ачба аԥсуа уаажәларра аԥсҭазаараҿы инаигӡоз ароль ахәшьара аҭара цәгьоуп. Зураб Константин-иԥа аоратор, адипломат бзиак иаҳасабала, ажәлар рҿаԥхьа ацәажәаратә ҟазара ибзианы идыруан, акрызҵазкуа, иузаҿаԥымҽуа аргументқәа раарԥшышьа идыруан, насгьы ауаа рыгәраргаразы аҟазара иман.
Зураб Ачба иполитикатә ԥсҭазаара далагеит Аԥсны жәлар рмилаҭтә-хақәиҭратә қәԥара аныҟалаз. Асовет Еидгыла иаҵанакуа ареспубликақәа рахь изныкымкәа имҩаԥигоз аныҟәарақәа раан, азинхьчаҩҵас ауаа рацәа дырԥылеит, ателедырраҭарақәа рҿы дцәырҵуан, Аԥсны иазкыз аҵабыргра реилыркаара, рызнагара дашьҭан.
1992-1993 шықәсақәа рзы Аџьынџьтәылатә еибашьраҿы Аԥсны жәлар аиааира анырга ашьҭахь, Зураб Ачба апарламент адепутатцәеи атәыла аполитикатә усзуҩцәеи дрыцны аконституциа аус адулара иалагеит.
Зҟазара ҳаракыз аиурист Зураб Ачба Аԥсны аомбудсментә усбарҭа аԥҵаразы раԥхьаӡа иқәгылоз аполитикцәа дыруаӡәкын, абжьааԥнытәи атәылауаа рзинқәа дрызхәыцуан, аграждантә еилазаара аҿиара дадгылан, аполитикатә система ииашаны аус аура иацхраауа, зыда ԥсыхәа ыҟам иҵабыргу аоппозициа дадгылан, гәымшәарыла, ҵаҵӷәыла уажәтәи аҳәынҭқаррахь акритика ааирԥшуан. Иара иеиԥш аӡәгьы изеилкаауамызт аԥсуа ҳәынҭқарра қәыԥш азы ауаҩы изинқәеи ихақәиҭреи рыхьчаразы ауасхыр ӷәӷәа ашьҭаҵара аҵакдура, дадгылан зхы иақәиҭу, ҳаамҭа иақәшәо, идемократиатәу Аԥсны, иара убас азинлеишәеи ауаҩы иҳаҭырқәҵареи еиҟараны иаззнеиларц.